ያልተጎሰመ አይን
እንግዲህ በምድር ያሉቱን ብልቶቻችሁን ግደሉ እነዚህም ዝሙትና ርኩሰት ፍትወትም ክፉ ምኞትም ጣኦትንም ማምለክ የሆነ መጎምጀት ነው፤ ቆላስይስ 3:5።
የሰው ልጅ ነገርን ከሚረዳበትና ከሚለይበት ነገሮች መካከል አንዱ አይን መሆኑ የማይካድ ሃቅ ነው። አበው በብሂላቸው እንኳኖ ሲያስቀምጡ "ነገር በአይን ይገባል" የሚሉት ብሂል እውነታው የማያከራክርና የማያወላዳ ነው። አንዳንዴም ነገር እውነት ለመሆኑና ላለመሆኑ "አይኔን እያየህ አውራ" የሚሉትም እንዲሁ ነው። ነገር በአይን ይገባል፣ ይዘልቃልም። እንግዲህ ይህን ያህል ካልን እና ቢበቃ እንደው ያልተጎሰመ አይን ክፋቱን እና በህይወት በተለይ በእግዚአብሔር ዘንድ ባለን ምልልስ እና የክርስትና ህይወታችን ላይ የሚያመጣውን አሉታዊ ጣጣን እንመልከት።
በተለይ ሥራ እያላቸው ሥራ ፈትተው የሚገኙ ሰዎች አይናቸው የማይፈለግን ነገር በማየት ተገቢ ያልሆነን ነገር በማድረግ ይታወቃሉ። ሥራ ያለው ሁልጊዜም ትኩረቱና እይታው ሥራ ላይ ብቻ ነው፣ በተለይ ለኃጢአት ጊዜና ቦታ ጨርሶውኑ የላቸውም።
ባልተጎሰመ አይን የኃጢአት ግብዣ
ሥራ ፈትቶች በቀላሉ በአይናቸው በኩል በሚመጣ ኃጢአት ይሳባሉ፣ ኃጢአትንም በቀላሉ ይሰራሉ። በቀላሉም ተጠቂና ተጎጂ ናቸው። በተለይ በመጽሐፍ ቅዱሳችን ላይ በእይታና በአይን ገብ ኃጢአት የተጠቃውና ኃጢአትን ሊሰራ የፈጠነ ቢኖር ንጉሥ ዳዊት ነው። ሠራዊት በጦር አውድማ ተገኝቶ በውጊያ ሳለ ንጉሥ ዳዊት በሰገነት በመገኘት በአይነ ገብ በሆነ ድርጊት ተፈተነ፣ መፈተን ብቻም አይደለም ወደቀ።
በተለይ አይነ ገብ በሆነ ኃጢአት የሚጠቃ ሰው በገዛ ስጋው ላይ ኃጢአትን እንዲሰራ መንገድ ከፋች ሲሆን፣ በቀላሉም በሚጥለው ኃጢአት ላይ በቀላሉ ይገኛል። "እንዲህም ሆነ፤ ወደ ማታ ጊዜ ዳዊት ከምንጣፉ ተነሣ፥ በንጉሡም ቤት በሰገነት ላይ ተመላለሰ፤ በሰገነቱ ሳለ አንዲት ሴት ስትጣጠብ አየ፤ ሴቲቱም መልከ መልካም ነበረች።" 2ኛ ሳሙኤል 11:2።
በመጨረሻም፦ "ከዓይኔ ጋር ቃል ኪዳን ገባሁ፤ እንግዲህ ቆንጆይቱን እንዴት እመለከታለሁ?" - ኢዮብ 31:1።
ያልተጎሰመ አይን የፍርሃት ምንጭ
በተለይ ባየነው ነገር ግዝፈት፣ ትልቅነት የምናያቸው ነገሮች የውስጥ ነገሮቻችንን ሲያወርዱና ወኔያችንን በማውረድ ሲያፍረከርኩን፣ በተጨማሪም ከራስ በመነሳትና በመነጨ የሌላውንም አቋም በመሸርሸር በፍርሃት አለም እንተበትባቸዋለን። "ምድሪቱንም ሊሰልሉ ሙሴ ልኮአቸው የተመለሱ ሰዎች ክፉ ወሬም ስለ ምድሪቱ እያወሩ በእርሱ ላይ ማኅበሩ ሁሉ እንዲያጉረመርሙ ያደረጉ፥ ክፉ ወሬ ያወሩ እነዚያ ሰዎች በእግዚአብሔር ፊት በመቅሰፍት ሞቱ።" - ዘኁልቁ 14:36። ባዩት ነገር ሕዝብ በማሸበር ለተነሱበት ብርቱ ጉዳይ የምፍረክረክ ሆነ።
በመጨረሻም፦ በምናየው ነገር ተወስደን እና ፍርሃት ተቆጣጥሮን ሌላውን ከማሸበር በእግዚአብሔር ላይ መደገፍ ይሁንልን።
ተባረኩ
አገልጋይ በረከት ሱላሞ ሱጌቦ